भदौ महिनामा पुंजी बजार बाट करिब तिन अर्ब पुंजीगत लाभकर उठेको छ। समग्र बजार भने भदौ महिनामा १४ प्रतिशत अर्थात् ४२० अंक घटेको थियो ।
साउन महिनामा उच्च अंकले बढेको बजार भदौ महिनाभर दबाबमा रहँदा पनि लगानीकर्ताले २ अर्ब ५७ करोड ९४ लाख रुपैयाँ पूँजीगत लाभकर तिरेका छन् ।
शेयर लगानीकर्ताहरुले साउन महिनामा भने सरकारलाई पूँजीगत लाभकर बापत ४ अर्ब २३ करोड ७८ लाख रुपैयाँ तिरेका थिए । नेपाल सिडीएस एण्ड क्लियरिङका अनुसार यो अन्य समयको भन्दा एक महिनामै उठेको सर्वाधिक उच्च राजस्व हो ।
भदौमा व्यक्तिगत दीर्घकालीन पूँजीगत लाभकरवापत ७३ करोड ३९ लाख रुपैयाँ राजस्व संकलन भएको छ भने व्यक्तिगत अल्पकालीन पूँजीगत लाभकर १ अर्ब ५३ करोड ८४ लाख रुपैयाँ राजस्व संकलन भएको छ ।
व्यक्तिगत लगानीकर्ताले एक वर्षभन्दा कम समय होल्ड गरेर बिक्री गर्दा आएको नाफामा ७.५ प्रतिशत र एक वर्षभन्दा बढी अवधि होल्ड गरेर बिक्री गर्दा आएको नाफामा ५ प्रतिशत पूँजीगत लाभकर तिर्नुपर्ने कानूनी व्यवस्था छ ।
यसैगरी, सोही महिनामा कर्पोरेट पूँजीगत लाभकरवापत ३० करोड ४० लाख रुपैयाँ राजस्व संकलन भएको छ भने स्टक डिलरबाट पूँजीगत लाभकरवापत ३० लाख ३९ हजार रुपैयाँ राजस्व संकलन भएको छ ।